LAOAG CITY – Maluksaw ni Mr. James Justo iti Sitio 5, Barangay Bengcag ditoy ciudad ti Laoag gapo iti pannakatakaw dagiti walo a para-pallot a manok na.
Segun kenni Justo, mapan da kuma agpakan ti manok itay bigat kadua na ti uliteg na a ni Mr. Benito Alcaraz ken ditoy a nadlaw da a mapukpukaw dagiti walo a para-pallot a manok.
Inlawlawag na nga agarop 100 a metro ti kaadayo na ti nakapupukan dagiti manok da iti pagtaengan da ken awan met ti nadnadlaw da.
Kunana nga addan ti makalawas ti napalabas sipud idi adda ti maipagarop a naginlalako ti baki ken gimmatang pay daytoy iti uppat a baki.
Inbatad na a nagpic-piture pay ti naglako ken nabayag pay laeng iti pagtaengan da ken atapen da nga adda ti ammo ti maseknan iti daytoy a banag.
Kalikagom ni Justo a maisubli dagiti natakaw a manok angruna ken mailaban kuma dagitoy ita a lawas ken nangina ti balor dagitoy.
Mainaig iti daytoy, kunana a daytoyen ti maikadua a gundaway a natakawan ti Justo ti manok gapo ta naala manen ti dua a manok na iti kallabes.
Malaksid iti daytoy, naamoan nga adda pay ti uppat a manok a kukua met ti karruba da ti natakaw idi laeng bulan ti Abril.
