LAOAG CITY – Binisita ti Social Security System (SSS) dagiti walo a pasdek negosyo iti ili ti San Nicolas kas paset iti Run After Contributions Evaders (RACE) Campaign.
Karaman kadagiti establishimento a binisita ti ahensya ket dua nga tutorial center, retail stores, vegetables vendors, furniture shops, ken rice retailers.
Segun kenni Mr. Richard Rarallo, Branch Head II iti Social Security System, kadagiti walo a nabisita ket adda ti maysa ti nagoperar a saan pay a rehistrado nga addaan ti walo nga empleado.
Inlawlawag na a dagiti dadduma met a nabisita nga establshimento ket nakarehistro ngem adda dagiti empleado a saan a naireport ken saan nga usto ti iremremit dagiti employer a kontribusyon dagiti empleado da.
Inbatad nga inadmitir met dagiti employers a saan da a simmurot iti pagalagadan ken nagkari dagitoy nga agcomply iti uneg ti 15 nga aldaw wenno agingga iti Nobyembre 6, 2025.
Innayon na a napateg ti nasao nga aktibidad tapno makita no maipapay met laeng kadagiti empleado ti usto a benepisyo da.
Kabayatanna, inbatad ni Atty. Warden Domingo, Legal Officer ti SSS – Laoag a no saan nga agcomply dagiti pasdek negosyo iti uneg ti 15 nga aldaw ket mairefer iti Legal Department para iti final demand letter.
Inpetteng a no saan manen a simmurot dagiti maseknan iti final demand letter ket irefer manen ti SSS-Laoag para iti pannakaipila ti kaso.
Innayon na a daytoy ti rason no apay a maiyus-uswat ti Run After Contributions Evaders tapno mapalagipan dagiti employers ti obligasyon da.
