LAOAG CITY – Nagkamang ti walo a security guard iti Urduja Security Agency ditoy Bombo Radyo Laoag gapu ta maipagarop a saan nga usto ti panagpapasweldo ti ahensya da.
Ti main office ti Urduja Security Agency ket iti Pronbisya ti Pangasinan.
Segun ken ni Mr. Julius Bancud saan da a makaawawat ti usto a benepisyo ken nangruna ti usto a sweldo iti laksid a naipatungpal manen ti minimum wage increase kadagiti pribado a sektor.
Kunana a sipu pay idi nangrugi ti tawen 2024 ket madeldelay ti sweldo da no sadinno a 1000 a pisos laengen ti maitited a sweldo da iti kada kinsenas.
Innayonna a saan da pay a masinuno no matintinnagan dagiti kontribusyon da iti Social Security System, Philhealth ken Pag-ibig.
Maladingitan ni Bancud ken dagiti kakadwa na sipud ta patas da met nga agtrabtrabaho ngem no apay a saan a maipaay ti ahensya da ti rumbeng a para kadakuada.
Kunana a nagreklaamo dan iti agency da ngem agingga ita ket saan nga ikankano ti agency ti reklamo da.
Impakaammo ni Buncad a ti sweldo na iti panagtrabaho na iti 11 nga oras ket umabot laeng iti 12,000 a pisos, no sadinno a ti naudi a naawat na a sweldo ket 1,900 a pisos.
Gapu iti daytoy ket kinuyog ti news team ti Bombo Radyo Laoag dagiti indibidual iti opisina ti Department of Labor and Employment no sadinno nga inpanamnama da a tulongan da dagitoy a maala ti rumbeng a para kadakuada.
