LAOAG CITY – Walo laeng dagiti nagpositibo manipod iti nasurok 500 a dimmalan iti swab testing babaen iti free mass swab testing a naiyuswat iti merkado publiko ditoy siudad ti Laoag idi lunes.
Daytoy ti inpakaamo ni Major Roxanne Parado, fire marshall iti Bureau of Fire Protection (BFP) ditoy siudad ti Laoag ken mangidadaulo ti contact tracing team ditoy probinsya.
Kuna ni Parado a basar iti pakabuklan a bilang dagiti dimmalan iti testing ket umabot laeng iti 2% ti nagpositibo.
Inbatad na a nababbaba daytoy ngem iti agarup 10% a positivity rate iti Brgy. 23 nu sadino nga adda ti outbreak ti virus itay kallabes.
Mainaig iti daytoy, kuna na nga agtultuloy ti pannakaiyuswat ti expanded testing ken ti pannakatrace dagiti posible a nakapulapol dagiti nagpositibo iti virus.
Inpakaamo na nga iti agdama ket adda ti 172 nga aktibo a kaso ditoy siudad ti Laoag nu sadino a 73 ti naduktalan a primary contact dagitoy.
