LAOAG CITY – Nagballigi dagiti kameng ti Philippine National Police (PNP) a nangtiliw ti maysa a wanted person iti Barangay 2 iti Sarrat, Ilocos Norte.
Binigbig ni Police Chief Inspector Roldan Suitos, hepe iti ili a Sarrat ti biktima a ni Jerry Lagonsa, taga Barangay 20 iti nasao nga ili.
Inbatad ni Suitos a natiliw ni Lagonsa babaen ti maysa a warrant of arrest gapu ti kaso na a direct assault.
Nairekomendar ti 12 ribo a pisos a piyansa ni Lagonsa para ti temporaryo a pannakawaya-waya na.
Kabayatanna, inpakaammo ni Suitos nga immunan a naibalud ti suspek gapu ti kaso na a panaglabsing ti Republic Act 9165 ken RA 10591.
Nupay kasta, kuna ni Suitos a nawaya-wayaan ti suspek kalpasan a nakapagpiyansa.
Iti agdama, nagtalinaed ni Lagonsa iti kustodyar iti PNP iti ili a Sarrat.
