LAOAG CITY – Manamnama a maipaima intono bolan ti Disiembre iti Philippine Atmospheric, Geophysical and Astronomical Services Administration wenno PAG-ASA dagiti “warning posts” ken “rainfall/water level stations” nga inpaay ti South Korea kas “grant” iti Provincial Government of Ilocos Norte wenno PGIN.
Daytoy ti inpakaammo dagiti pannakabagi ti South Korea kangrunaanna iti K-water wenno ti Korea Water Resources Corporation iti panag-courtesy call dagitoy ken ni Gob. Cecilia Araneta Marcos iti Provincial Resiliency Office nga inatendaran da Mr. Marcell Tabije, local disaster risk reduction and Management officer ti PGIN ken ni Engr. Randy Nicholas, maysa kadagiti agpapaay iti Provincial Resiliency Office ken ni Engr. Cynthia Iglesia ti PAG-ASA.
Inpakaammoda a kalpasan ti panangisayangkatda iti inspeksion kadagiti naiyestablisar a ramit ket nakasaganan dagitoy a mangiyawat kadagiti nasao a ramit.
Nupay kasta, iti agdama, maiyur-uray pay laeng ti pinal nga aldaw a mapagnunumoan dagiti maseknan para iti pannakaiiyawat dagiti kagamitan iti PAG-ASA ken iti PGIN wenno iti maseknan a Local Government Unit.
Immun-unan nga inrakurak ni Tabije a dagiti nainstolar a “rainfall/water level stations” ti mangrukod iti kaadu ti maibukbuk a tudo ken daytoy ti mangi-send ti maukkonna a data iti “server” ti PAG-ASA idinto a ti “warning posts” ti mausar a pangmonitor iti danum ti Karayan padsan ken mangipaay ti ballaag kadagiti kakailian.
Naammoan a naiplastar dagiti nasao a kagamitan iti Karayan padsan iti paset ti ili a Nueva Era, Banna, Marcos, Solsona, Carasi, Piddig, Sarrat, Nueva Era ken adda dagiti sumagmamano a lugar iti siudad ti Laoag kas iti Gilbert bridge, Mangato Bridge, Zamboanga, Brgy. uno, Brgy. 29, Gabu ken iti Brgy. 24.
