LAOAG CITY – Impagarup ti maysa a babai idiay New Jersey, Estados Unidos, nga awanen ti wedding ring-na kalpasan nga aksidente a nai-flush-na daytoy iti toilet ti tren. Ngem gapu iti panagregget dagiti empleado ti NJ Transit, naala ti singsing ken naisubli kenkuana.
Adda ni Julie Angelicola iti tren ti NJ Transit idi inusarna ti comfort room. Kalpasan ti sumagmamano a kanito, nadlaw ni Angelicola nga awanen iti ramayna ti singsing ti kasarna. Dayta idi naamirisna a mabalin a naikkat dayta bayat ti panangpunasna kadagiti imana ken nalaokan kadagiti tisyu nga in-flush-na iti toilet.
Insigida nga impakaammona iti NJ Transit ti insidente. Imbes a baybay-an, temporario a naikkat ti tren tapno sapulen daytoy.
In-jack-up dagiti empleado ti tren sakbay nga inikkatda ti tangke ti toilet ken linuktanda. Bayat ti panagbirokda, nasarakanda ti singsing ni Angelicola iti uneg ti tangke.
Naisubli kenkuana a personal ti singsing iti maysa nga NJ Transit Customer Service Center.
Nagyaman unay ni Angelicola ta naisangsangayan daytoy a singsing ta malaksid a wedding ring, antique daytoy ken mapattapatta a naaramid idi 1905, no sadinno a ginatangna daytoy iti antique store.
