LAOAG CITY – Kinumpirmaran ti White House a maiyuswat idiay Anchorage, Alaska ti naikeddeng a panagkita da United States President Donald Trump ken Russian President Vladimir Putin.
Inbatad ni White House press secretary Karoline Leavitt, manarimaan ti pannakaiyurnos dagiti sumagmamano a detalye iti nasao a panagtaripnong.
Saanna met a kinumpirmaran no makipagpaset iti panagtaripnong ni Ukrainian President Volodymyr Zelensky.
Ibilang ti White House a ti taripnong ket maysa a “listening exercise” gapu iti maysa a partido laeng ti agatendar iti nasao a taripnong.
Naammoan a saan met a nadakamat no ilungalong ni Trump ti maaddaan ti ceasefire deal iti nagbaetaan ti Russia ken Ukraine.
Maipalagip nga ilunglungalong ti European Union a nasken a karaman ti Presidente ti Ukraine iti taripnong para iti naan-anay a pannakaipatungpal ti ceasefire deal.
