LAOAG CITY – Naiget latta ti talek ti White House iti United States Secret Service tapno bantayan ti seguridad ni United States President Donald Trump kagiddan ti insidente ti pammaltog iti maysa nga hotel iti Washington, D.C.
Segun iti maysa nga opisial ti White House, mamati ti Presidente a nasayaat ti nagbalin a tignay ti Secret Service agent kalpasan a nalappedanda ti suspek.
Kagiddan iti daytoy, mangiwayat met ti naig-iget a panangipatungpal iti security protocols tapno maliklikan ti kapada a pasamak iti masangoanan.
Maipalagip a napasamak ti insidente nga asideg iti security checkpoint iti lobby ti hotel no sadinno nga insayangkat ti maysa nga event mainaig iti White House Correspondents’ Dinner.
Basar kadagiti otoridad, ti suspek ket nabigbig a ni Cole Tomas Allen, agtawen ti 31 manipud idiay California nga inarestar kalpasan a maipagarup a nagpaputok ti paltog iti lugar.
Naikeddeng isuna a sumango iti korte para iti agsusukot a kaso.
Naammoan a ni Allen ket self-described a game developer ken mangisursuro ngem agtultuloy nga am-ammoen dagiti imbestigador ti motibo ken dadduma pay a detalye.
Kabayatanna, inbatad ni Federal Bureau of Investigation (FBI) Director Kash Patel a nakasagana ti Federal Bureau of Investigation a tumulong iti posible manen a pannakaisayangkat ti White House Correspondents’ Dinner iti uneg ti sumaruno a maysa a bulan nupay awan pay ti pinal nga anunsio.
