LAOAG CITY – Inrakurak ti mangidadaulo ti World Health Organization a ni Tedros Adhanom Ghebreyesus nga agkissayda ti agarup kagudua ti executive management team-da iti baet ti nakaro a kinakurang iti pundo gapu iti panangikkat ti pundo ti Estados Unidos.
Manipud iti 11 ket nagbalin laengen nga innem nga opisial ti mangbukel iti baro nga headquarters ti World Health Organization idiay Geneva mangrugi inton Hunio 16.
Karaman kadagiti tumalaw ket isuda Mike Ryan, director ti emergency response ken Bruce Aylward, mangidadaulo ti universal health coverage program ken dagiti kangrunaan a tauhan iti laban ti World Health Organization kontra COVID-19.
Inbatad ni Tedros, dakkel ti naimbag a nakem ti organisasion ken ni Ryan gapu iti nagbalin a napintas a papel idi pandemia.
Agtalinaed met ti baro a team ni Jeremy Farrar kas assistant director-general iti health promotion. Ti dati a posision kas chief scientist ket iyakar ken ni Dr. Sylvie Briand ti France.
Nagballaag ni Tedros idi Abril a sumango ti World Health Organization iti kinakurang iti sueldo a dumanon iti $560 million agingga iti $650 million para iti tawen a 2026-2027. Saan pay latta a nagbayad ti 2024 contributions ti Estados Unidos ken saan a manamnama nga agbayad ita a 2025.
Nadakamat a ti Estados Unidos ti kadakkelan a donor ti World Health Organization a nangipaay ti $1.3 billion para iti 2022-2023 budget.
Nupay kasta, kaaduan ditoy ket boluntario a kontribusion para iti kangrunaan a proyekto, saan a kas paset ti opisial a membership dues.
Manamnama a mapagsasaritaan daytoy nga isyu iti tinawen a World Health Assembly ti World Health Organization inton sumaruno a lawas.
