LAOAG CITY – Inpakaammo ni Mr. Gene Reginaldo, ti Sports Supervisor iti Department of Education a naiget a maipatpatungpal ti Window Hour babaen ti Region 1 Athletic Association Management Team.
Segun kenkuana, daytoy ti kangrunaan a wagas nga ar-aramidenda tapno masalakniban ti salun-at dagiti maseknan nga atleta ken maliklikan ti kinabara ti panawen.
Inbatadna a napintas ti pannakaipatungpal ti iskedyul dagiti amin nga ay-ayam tapno awan ti maikabil iti peggad nga umaayam kabayatan ti panagay-ayamda ti nasao nga aktibidad.
Inlawlawagna a naiget ti panangmonitorda kadagiti amin a billeting venues tapno maipasigurado nga adda iti natalged a kondision dagitoy iti baet ti kinapudot ti paniempo.
Mainaig iti daytoy, kuna ni Mr. Reginaldo ket adda ti naiyuswat a panagtataripnongda iti Philippine National Police, City ken Municipal Disaster Risk Reduction and Management Office, City, Municipal ken Provincial Health Office ken dadduma pay para iti pannakaipasigurado ti naan-anay a seguridad dagiti atleta.
Kabayatanna, segun ken ni Mr. Eric Aguilar, ti Sports Coordinator iti Department of Education – Ilocos Norte nga agtultuloy a naannayas ti maisaysayangkat a Region 1 Athletic Association Meet agsipod ta awan dagiti nakaro nga aniaman a problema a mapaspasamak.
