LAOAG CITY – Nagbalin a napintas ti bunga ti pannakitaripnong ni Ukrainian President Volodymyr Zelensky kadagiti lider ti European Union idiay Brussels, Belgium.
Daytoy ket kalpasan a nakaala ti suporta militar kadagiti European countries.
Indauloan ti Belgium ti pannakaipaay ti F16 fighter jets iti Ukraine inton 2026 idinto ti Crotia ket nangilatang ti dua a porsiento ti defence budget-da ken 30 a porsiento para iti military modernization.
Adda met ti baro a kontrata ti United Kingdom government iti panagsuplay kadagiti attack drones iti Ukraine a nakadisensio para iti panang-monitor iti aniaman nga strike.
Inlungalong ti Lithuania nga inton Enero 31, 2030, ti petsa no sadinno nga agbalinen a miembro ti Ukraine ti European Union.
Dumanon iti 20 a pagilian ti interesado nga agbalin a miembro ti maaw-awagan a ‘coalition of the willing” a mangsuporta iti Ukraine.
Mangnamnama ni Zelensky nga agbalin a balligi ti agbalin a taripnong daytoy kadagiti sumagmamano a nangangato nga opisial ti Estados Unidos kadagiti sumaruno a lawas.
