LAOAG CITY – Namnamaen ni Presidente Volodymyr Zelensky ti Ukraine a maaramid dagiti napateg a pangngeddeng iti Group of Seven summit wenno G7 summit dagiti lider manipud iti pito kadagiti kabaknangan a nasyon iti sangalubongan.
Kuna ti White House a nasayaat ti panagrang-ay ti G7 iti plano ti Estados Unidos a mangusar kadagiti frozen assets ti Russia tapno makaurnong iti $50bn iti makatawen.
Maipalagip a timmabuno ni Zelensky iti summit idiay Italy, ken manamnama a pirmaan na dagiti baro a security deals iti Japan ken Estados Unidos.
Iti sidong ti international law, saan a mabalin kumpiskaren dagiti pagilian dagiti sanikua manipud Russia ken itedda iti Ukraine.
Kabayatanna, dagiti nasyon iti Group of Seven summit wenno G7 summit ket Canada, France, Germany, Italy, Japan, United Kingdom ken United States, no sadinno a maibilang dagitoy kas napapateg a pagilyan a mangsupsuporta iti pinansial ken militar a tulong iti Ukraine sipud idi rinaut ti Russia ti Ukraine idi 2022.
