LAOAG CITY – Target ti gobyerno a maaddaan ti casualty-free elections iti May 2025 Midterm Election.
Segun ken ni Department of the Interior and Local Government (DILG) Secretary Juanito Victor “Jonvic” Remulla a binilin isuna ni Presidente Ferdinand Marcos Jr., a siguradwen na ti kinatalged ken seguridad dagiti kandidato ken publiko para iti mapaspasangasangan nga eleksyon iti pagilian.
Inbatad na a kas lokal nga opisyal ti probinsya ti Cavite, inikkan na ti kada mayoral candidate ti maysa a mobile patrol vehicle tapno siguradwen ti kinatalged dagitoy ken uray dagiti personal bodyguards da.
Basar iti initial assessments, inrakurak ni Remulla a dagiti lugar a mabalin nga ibilang kas hotspots iti 2025 elections ket ti Bangsamoro Autonomous Region in Muslim Mindanao (BARMM), Cagayan, Nueva Ecija, ken Palawan.
Iti agdama, kuna ni Remulla nga im-imbestigaren paylaeng dagiti otoridad ti shooting incident iti Shariff Aguak, Maguindanao del Sur a napasamak idi Martes a naudi nga aldaw ti panagpila ti certificate of candidacy (COC).
Kabayatanna, inpalagip manen ti Commission on Elections (Comelec) a ti campaign period para kadagiti kandidato a para senador ken party-list groups ket manipod iti Pebrero 11 agingga iti Marso 10, 2025 idinto a dagiti na kadidato para kongresista ken parliamentary, provincial, city ken municipal elections ket manipod Marso 28 agingga iti Mayo 10, 2025.
Ti Election day ket intono Mayo 12, ngem mabalinen nga agbotos dagiti overseas voters manipod Abril 13 agingga iti Mayo 12 idinto a dagiti local absentee voters ket mabalin nga agbotos manipod Abril 28 agingga iti 30.
