LAOAG CITY – Pinalagipan ni Vice Mayor Rey Carlos Fariñas dagiti opisyal iti Barangay Buttong ditoy ciudad ti Laoag a saan da a tultuladen iti isyu a napamasak kenni dati a Barangay Chairman Dan Toledanes iti Brgy. 2 ditoy ciudad iti kallabes.
Daytoy ket kalpasan iti panagatendan ti bise mayor iti barangay assembly iti nadamak a barangay.
Segun kenkuana, awan ti lugar iti asinno man nga opisial a mangdangran iti pada a tao.
Inpetteng ti bise mayor a dagiti nabutusan nga opisial ket isuda kuma iti mangidaulo wenno agbalin a pagwadan dagiti kabaragayan da kadagiti napipintas nga aramid.
Mainaig iti daytoy, dinayaw ni Fariñas dagiti opisyal ti nasao a barangay gapu ta isuda ti maysa kadagiti nakitana a kaadoan a partisipantes kabayatan iti barangay assembly.
Kabayatanna, kuna Fariñas a napintas iti pannakipaset iti barangay assembly tapno makita dagiti nagdur-asan iti barangay, maipakaammo dagiti nagduduma nga aktibidad ken kangrunaan ti amin ket maipadanun dagiti arungaing wenno pakaseknan dagiti residente.
