Makaawat dagiti indigent college students iti P3.7 billion manipud iti gobierno tapno suportaran ti kasapulanda a mangileppas iti degree-da.
Segun ken ni Department of Budget and Management (DBM) Secretary Amenah F. Pangandaman, nangilatangda iti badyet para iti 247,135 student grantees iti babaen ti programa ti Tulong Dunong ti Commission on Higher Education (CHED).
Inaprobaran ti Secretary ti pannakaipaulog ti special allotment release order idi Abril 15.
Mainaig iti daytoy, ti badyet ket makatulong kadagiti benepisiario nga agad-adal a nakaenrol iti babaen ti “CHED-recognized public and private higher education institutions” tapno matulongan dagiti pinansial a kasapulanda iti tertiary education para iti maikadua a semestre ti akademiko a tawen (AY) 2023-2024 ken umuna a semestre ti AY 2024-2025.
Gapu iti daytoy, ti programa ti Tulong Dunong ket paset ti “Universal Access to Quality Tertiary Education – Subsidy ti Tersiary Education.”
Para iti daytoy a tawen, nangilatang ti sektor ti edukasion iti P924.7 bilion a katupag ti 16% iti P5.768 trillion 2024 budget plan.
Kabayatanna, nangilatang ti gobierno iti P27.2 billion para iti Free Higher Education program a mangsaklaw ti tuition ken dadduma pay a school fees dagiti estudiante iti “state universities and colleges” ken “CHED-recognized local universities and colleges.”
