LAOAG CITY – Maluksaw ni Mr. Nardito Reyes iti Barangay Lydia iti ili ti Marcos iti pannakatay dagiti 10 a taraken na a kalding gapo iti maipagarop a panaginom da ti danom a nalaukan ti abono.
Inbatad na a karaman kadagiti natay ket walo a pagganakan ken dua a bumaro no sadinno sumagmamano kadagitoy ket masikog pay ken agbalor dagitoy ti agarop 40 a ribo a pisos.
Segun kenni Reyes, idi bigat kalman ket napan ti ama na iti sapaw da ken nakita na dagiti dua a kalding da a matmatay rason a dagus na nga intawag kenni Mr. Nardito, ken kinita da no adda ti sugat iti bagi dagitoy agingga a pinarti da.
Inlawlawag na nga iti leppas pangaldaw idi laeng kalman ket nakita manen ti ama na dagiti walo a kalding a matmatay rason a napan a dagus iti pagpupukan dagitoy ken nakita na ti paginoman da nga addaan ti abono partikular ti urea.
Innayon na nga idi nakita na dagiti kalding na ket aglablabutab ti ngiwat dagitoy.
Dagus na met nga inreport iti barangay da pakairamanan ti Agriculture Office iti ili ti da ken iti Philippine National Police.
Mainaig iti daytoy, patien ni Reyes a nairanta ti napasamak kadagiti kalding na nga isu ti pakaluksawan na.
Kabayatanna, kunana nga adda pay ti pito a kalding a nabati ken isu ti ob-obserbaren na iti agdama ken mangnamnama nga awan ti madi a mapasamak kadagitoy.
