LAOAG CITY – Ilunglungalong ni House Deputy Majority Leader ken ACT-CIS partylist Rep. Erwin Tulfo ken uppat pay a kaduana iti Kongreso a maipaayan ti 10 percent discount iti agas dagiti rank ken file nga agpapaay iti gobierno tapno makatulong kadagiti gastosenda iti panagsakit.
Inbatad ni Tulfo a basar iti gakat, sakupen daytoy dagiti agpapaay ti gobierno nga addaan ti sueldo a 30 a ribu ken agpababa.
Ti laeng valid ID dagiti empleado ti gobierno ti kasapulan nga ipakita ken pammaneknek nga agsusueldo dagitoy ti 30 a ribu a pisos ken agpababa tapno makaala ti 10 percent discount kadagiti agas pakairamanan dagiti branded ken generic drugs.
Nailanad pay ditoy a no asinoman ti aglabsing wenno saan a sumurot ket mabalin nga agmukta ti P50,000 agingga iti P100,000 wenno maibalod ti innem agingga iti maysa a tawen ngem nakadepende iti kadagsen ti basolna.
