LAOAG CITY – Umabot iti 10 a tattao ti natay ken 25 ti nasugatan kalpasan a uram iti maysa a pasdek idiay Lagos, Nigeria.
Gapo iti daytoy ket timmapwak dagiti agnanaed iti pito a kadsaaran nga Afriland Towers manipud iti maikatlo ken maikapat a kadsaaran.
Basar iti impormasyon, dagiti biktima ket agpapada a commercial workers no sadinno napupok da iti uneg ti pasdek, nga isu ti pagnanaedan dagiti kaadoan nga empleado ti commercial companies ken organizations iti ciudad.
Kaadoan met kadagiti nakalasat ket nagsagaba ti sugat gapo iti pannakauram kasta metten ti pannakatukkol ti sumagmamano a paset ti bagi da gapo iti gandat da a makapanaw iti pasdek idinto a dagiti dadduma ket nakalab-ab ti asok.
Inbatad dagiti otoridad a dagiti tattao ket nakaro ti sinagaba da gapo iti asok ken kaawan ti clear evacuation guidance isut gapo na a binuong da dagiti tawa nga isu ti nagruwaran da ngem severe trauma ti pinasar da.
Segun iti maysa kadagiti nakakita iti pasamak, adda ti agdan nga inpaay da tapno aasistiran dagiti biktima ngem saan a nakaanay gapo iti panagkalikagom dagitoy a makarwar a dagus.
Iti met rakurak ti Lagos State Emergency Management Agency, nagpaot ti uram iti sumagmamano nga oras a nangrugi iti basement iti pasdek nga isu ti nakainstularan dagiti electrical equipment.
