LAOAG CITY – Inpasingked ti Department of Energy (DOE) nga umdas ti supply ti LPG wenno Liquefied Petroleum Gas iti Pilipinas, iti baet paylaeng ti nangato a presyo ti krudo iti pagilian.
Inbatad ni Energy Secretary Sharon Garin a nupay nagsardeng ti panag-export ti sumagmamano a major producer ti LPG, dagus a nakabiruk ti alternatibo a source ti gobierno ken dagiti kompanya ti langis iti Pilipinas.
Kuna na a ti napateg aglalo ket saan laeng nga iti balay a maus-usar ti LPG, no di ket uray iti commercial establishments kas kadagiti restaurants.
Malaksid iti China ken Hongkong, nakabiruk pay ti supplier dagiti kumpanya agingga iti Australia ken Estados Unidos, ken iti agdama ket makaal-alan ti pagilian ti supply manipod kadagitoy.
Innayon na a nupay saan pay a komportable ti nasao a bilang, agar-aramid ti wagas ti Philippine National Oil Company (PNOC), kas ti naituding a panag-procure ti maysa a vessel, tapno matulungan dagiti kumpanya, iti panangpatalged pay ti LPG supply iti pagilian.
