Inbatad ni National Food Authority Administrator Larry Lacson nga adda makaro a panagbaba iti produksyon ti pagay ita a wet harvest season.
Segun ken ni Lacson, pakairamanan ti kangrunaan a rason a nangitunda kadaytoy ket ti desision dagiti saumagmamano a lokal a mannalon a saan pay laeng agmula gapu iti nangato a cost of production, partikular ti panagngato ti presio dagiti abono ken ti dakkel a pannakadadael gapu iti habagat ken nagsasaruno a bagyo kadagiti talon ken ramit.
Iti agdama, agay-ayam iti P16 agingga P17 ti kapital dagiti mannalon iti tunggal kilo, kabayatan nga ur-urayen pay ti ahensia ti opisial a datos manipud Philippine Statistics Authority (PSA) tapno maamoan ti pakabuklan a porsiento ti panagbaba ti apit.
Kas nasapa a panagsagsagana iti dandani a dry season harvest no sadinno manamnama a mangrugi ti panagmuma dagiti mannalon inton Enero, agtultuloy ken papaalistoen ti ahensia ti konstraksion dagiti kanayonan a dryer ken miller a manamnama a makumpleto inton sumaruno a tawen.
Paset dagiti addang ti ahensia ti panagrenta ti kanayonan a 65 a pribado a bodega, laksid iti agsina a nalpas a panagurnos dagiti bukodna a pasilidad.
Gapu iti daytoy, kabaelan ti umabot iti maysa a million a metriko tonelada ti pakabuklan a kapasidad ti pagilian iti panagimbak ti pagay ken bagas.
Malaksid iti daytoy, pakairamanan pay dagiti inpasdek ken nilukatan a bodega ti NFA ket makita iti Dumangas ken dadduma pay a paset Iloilo; Region 5 iti Albay, Camarines Sur, ken Catanduanes; ken Region 4 iti Palawan ken Occidental Mindoro.
Segun ken ni Lacson, dakkel a tulong dagitoy a proyekto tapno ad-ada a mapapigsa dagiti pagay procurement program-da ken masigurado ti naurnos a serbisio kadagiti mannalon kabayatan ti mapaspasaran a karit iti sektor ti agrikultura.
