LAOAG CITY – Inbatad ni Dr. Shirley Agrupis, ti presidente iti Mariano Marcos State University (MMSU) iti ciudad ti Batac a napalalo ti ragsak da kalpasan a nakapasa amin dagiti estudyante da iti kalepleppas a Physician Licensure Examination.
Inbaga ni Agrupis a saan a nalaka ti naglasatan dagiti nasao nga estudyante da gapu ta iti baet ti mapaspasaran a covid-19 pandemic ket saan a nagbalin a lapped tapno magun-od da ti arapaap da nga agbalin a naan-anay a doctor.
Gapu iti daytoy, kuna ni Agrupis a napalalo pay ti panagyaman da iti Diyos gapu ta saanna a binaybay-an dagiti maseknan.
Nagyaman pay ni Agrupis kadagiti amin a mangbukbukel iti Mariano Marcos Memorial Hospital and Medical Center ken dagiti amin a miembro ti College of Medicine iti MMSU nga idaulwan ni Doctor Ricardo Guanzo.
Karaman pay a nagyamanan ni Agrupis dagiti stakeholders da ken amin a mangsupsuporta ti College of Medicine iti MMSU.
Karaman kadagiti nakapasa iti nasao nga eksaminasyon ket isuda Dr. Jaymee B. Quindara (Top 9), Dr. Charis Vina E. Keith, Dr. Aileen Conception M. Agustin, Dr. Elma Flor O. Delos Santos-Lucero ken ni Dr Jonathan C. Lim.
