LAOAG CITY – Nakasaganan ti Philippine National Police Region 1 para iti pannakaipatungpal ti naiget a protocol iti pananglagip iti Undas 2026.
Inpakaammo ni Police Major Cherry Tolentino, pannakangiwat ti Philippine National Police iti rehiyon Uno, adda ti pakabuklan nga 6,181 a kameng ti pulisya ti intero a region I no sadinno nga adda pay ti 1,023 a force multipliers manipud kadagiti dadduma pay a law enforcement agencies ken ti 5,794 nga indibidual a nakasagana a tumulong iti nailian a pulisya.
Mainaig iti daytoy, pinalagipan ni Tolentino ti publiko aglalo kadagiti agturong iti kamposanto a masapol a masurot dagiti protocols kas ti saan a panagitugot kadagiti natatadem a banag, ramit a mausar iti panagsugal, arak ken dagiti dadduma pay a masansan nga itugtugot dagiti tattao a mabalin a makadangran iti sabali a tao.
Kuna ni Tolentino a kabayatan nga umas-asideg ti Undas ket namnamaen ti naig-iget a pannakaipatungpal dagiti protocols aglalo iti aldaw iti Nobiembre 1 ken 2, a kaado dagiti tattao nga agturong iti kamposanto.
Kabayatanna, nagpanawagan ti Philippine National Police-Region I, iti publiko babaen ken ni Police Major Cherry Tolentino ti nasapa a panagturong da iti kamposanto tapno maliklikan ti aberya, kasta met ti panangitugotda ti payong ken danum gapu iti nabara a panawen.
