LAOAG CITY – Naarestar ti 11 a domestic workers gapu iti illegal abortion idiay Hong Kong.
Natiliw dagiti suspek nga agtawen ti 30 agingga iti 40 kalpasan a naduktalan ti maysa kadakuada iti pagtaengan ti amona nga adda ti natay a fetus a 28 a lawas pay laeng.
Nakita dagiti pulis ti nagduduma a klase ti droga a mapapati nga us-usarenda dagiti suspek kas abortion pills.
Basar kadagiti otoridad, napilaan ti kaso ti lima kadagiti suspek, lima ti nagpiyansa idinto a ti maysa ket manarimaan ti pannakaimbestigarna no sadinno a no mapaneknekan a guilty dagitoy ket posible a masentensiaanda iti tungpal-biag a pannakaibalud.
Namunganay ti imbestigasion idi Hunio kalpasan a nagkiddaw ti tulong ti paramedics iti kapulisan a tulungan ti agtawen ti 39 a domestic worker a napukawan ti puot iti pagtaengan ti amona.
Nakita ti paramedics ti fetus a nakaidulin iti pangikabilan dagiti bado a natayen.
Mainaig iti daytoy, ti abortion wenno ti panangiregreg ti sikog ket legal idiay Hong Kong ngem adda ti kondisionna no daytoy ket makita nga adda iti risgo ti biag ti maysa nga ina.
Naammoan a dumanon iti 368 a ribu a foreign domestic workers idiay Hong Kong no sadinno a kaaduan ditoy wenno 55% ket manipud ditoy Pilipinas idinto a 42% ket manipud idiay Indonesia.
