LAOAG CITY – Inpakaamo ni Barangay Chairman Primo Jay Ramos iti Brgy. 23 ditoy siudad ti Laoag a dimmalan iti swab test dagiti 11 a kabbalay ni IN-C134.
Segun kenkuana, kalpasan a naamoan a nagpositibo iti covid-19 ti kabarangayanda ket dinawat na a dagus kenni Mayor Michael Keon ti pannakaipan ti lockdown iti Northeastern portion ti Sitio Dungtal iti nasao a barangay ken ti pannakaipadalan ti swab test dagiti kabbalay na.
Inbatad ni Ramos a ti nasao a pasyente ket aglaklako kadagiti nagduduma a makan kas iti mani, chicharon ken dadduma pay.
Innayun na nga makadandanun daytoy nga aglako iti ili ti Paoay, Badoc ken San Nicolas.
Mainaig iti daytoy, kuna na a saan na pay a masinunuo ti sitwasyon ti contact tracing kadagiti nakapulapol na agsipod ta adu dagiti nagturungan na a lugar.
Kuna ni Ramos nga iti agdama ket nagtalinaed iti quarantine facility ni IN-C134.
Maipalagip a ni IN-C134 ket agtawen ti 56 a babai, maysa nga ambulant vendor ken residente iti nadakamat a barangay.
Maysa nga symptomatic wenno adda dagiti marikna na a sintomas iti virus ken saan pay a masinunuo nu nakaalaan na ti virus.
