LAOAG CITY – Agpapan ita ket saan pay a masigurado nu ana a klase ti ayup ti mangdaddadael kadagiti kalding iti Brgy. Saud iti ili ti Badoc.
Segun ken ni Brgy. Chairman Arthur Simanga iti nasao a barangay, saan a masinunuo dagiti kabaranggayan na nu ana a klase ti ayup ti akin aramid ti pannakatay ken panagsagaba ti sugat dagiti kalding iti barangayda.
Inbatad na a naklaat dagiti kabaranggayan na gapu iti kaaudu ti kalding a naudatal iti taltalon nga umabot iti 12 ken adu ti sugat wenno arigna napirpirsay ti bagi da.
Kuna na a malaksid kadagiti 12 ket adda pay ti maysa nga urbon a mapukpukaw.
Mainaig iti daytoy, inbaga na a ti atapen da a nagaramid iti nasao a pannakadangran dagit kalding ket maysa a dakkel nga aso.
Innayun na a kaaduan kadagiti nakagkagat ken natay a kalding ket dispersal wenno naggapo iti Department of Agriculture.
Kabayatanna, kuna ti kapitan a saan met a daytoy ti umuna a gundaway nga adda dagiti natay a kalding.
