LAOAG CITY – Inpakaammo ni P/Maj. Lester Dabbay, Officer In Charge ti Pagudpud Municipal Police Station a rimmuar iti windshield ken nagudua ti bagi ti dua a senior citizen a nakalugan ti SUV kalpasan a naidungpar iti mahogany tree iti Barangay Caunayan iti ili ti Pagudpud.
Segun kenkuana, adda ti walo nga indibidual pakairamanan ti driver ti nakalugan ti SUV nga aggapu iti Cauayan City, Isabela.
Inbatadna a kabayatan ti panangiturong ti driver iti SUV nga agpasalog ket kellaat daytoy a napukawan ti kontrol ti manibela agingga a naidungpar iti mahogany tree.
Inlawlawagna a gapu iti kinapigsa ti impact ti disgrasia ket rimmuar iti windshield ti dua a senior citizen a pasahero nga agtawen ti 60 ken 63 iti SUV no sadinno a nagudua pay ti bagi dagitoy.
Kunana a dead on the spot ti maysa kadagiti biktima idinto a natay ti maysa pay a biktima kabayatan a matamtaming iti Bangui District Hospital.
Innayonna nga addan iti stable wenno nasayaat a kasasaad dagiti dadduma a pasahero ti SUV ken manarimaan a maiyur-uray a maiyakar dagitoy babaen kadagiti medical team manipud iti Cauayan City, Isabela.
Naammoan nga agturong koma iti Paoay Church dagiti biktima idi napasamak ti disgrasia.
Maipalagip a naidungpar ti SUV iti mahogany tree a nakatayan ti dua a senior citizen gapu iti self vehicular accident.
