LAOAG CITY – Balligi ti pannakaiserbi ti warrant of arrest iti maysa a babai iti ili ti Pagudpud a sumangsango ti kaso a panagtakaw.
Segun ken ni P/Maj. Lester Dabbay, Hepe ti Pagudpud Municipal Police Station, ti subject ket maysa a babai, agtawen ti 27, awanan asawa, awanan trabaho ken residente ti Barangay San Lorenzo iti ili ti Bangui.
Inbatadna a ti pannakaiserbi ti warrant of arrest ket nagbinnuligan ti Pagudpud Municipal Police Station kas lead unit ken ti Ilocos Norte Police Provincial Office.
Inlawlawagna a ti warrant of arrest ket gapu iti kaso ti nasao a babai a Qualified Theft babaen ti Article 310.
Kunana a boluntario a simmuko ti suspek ken naikabil iti kuerpo ti pulisia.
Nupay kasta, inpakaammo ni P/Maj. Dabbay a nakaruar met laeng daytoy nga insigida gapu ta nagbayad ti piyansa nga 40 ribu a pisos.
Innayonna a nabayagen ti krimen nga inaramid ti babai no sadinno a maipagarup a nagtakaw ti kuarta ken dadduma a ramit ti establishimento a pagtrabtrabahoanna idiay Manila.
