LAOAG CITY – Naidungpar ti agaama a nakalugan ti motorsiklo iti nakaparada a motorsiklo iti national highway iti Barangay Poblacion 2 iti ili ti Pagudpud.
Ti ama a nangiturong ti motorsiklo nga Honda Click 160 ket agtawen ti 35, ti ina ket agtawen ti 31 ken ti anakda nga agtawen ti 4 a lalaki a residente dagitoy iti Barangay Caparispisan iti ili ti Pagudpud.
Basar iti Pagudpud Municipal Police Station, kabayatan a dumaldalyasat ti nagluganan a motorsiklo ti agaama nga agturong nga agpa-laud ket kellaat a napukawan ti kontrol ti manibela a nangitunda ti pannakaidungparda iti nakaparada a motorsiklo a TMX 155.
Gapu iti daytoy, naipurwak ti agaama agingga a naidungpar ti luganda iti poste ti solar street light.
Nagsagaba ti sugat iti nagduduma a paset ti bagi ti agaama a naitaray iti Pagudpud Adventist and Wellness Center para iti pannakatamingda ken naiyakar ti ubing iti Mariano Marcos Memorial Hospital and Medical Center iti siudad ti Batac.
Nupay kasta, naideklarar a dead on arrival ti ama babaen ti attending physician a ni Dr. Reymond Abalos.
Naammoan a ti rason ti pannakatay ti driver ti motorsiklo ket Traumatic Brain Injury secondary to a vehicular accident.
