LAOAG CITY – Inrakurak ti Philippine Competition Commission (PCC) a nangipila daytoy ti reklamo kontra kadagiti 12 traders ken importers a maipagarup nga onion cartel.
Basar iti pannakabagi ti Philippine Competition Commission Enforcement Office, simrek dagiti trader iti “anti-competitive agreements” para iti suplay ti imported onions manipud 2019 agingga idi 2023.
Nakikunsabo dagiti trader tapno makontrol ti presio ken limitaran ti kompetision a makaapektar kadagiti konsyumer ken iti ekonomia iti pakabuklan.
Inbatad dagiti Philippine Competition Commission representatives a daytoy ti umuna a gundaway a nangipilada ti kaso kontra iti cartel gapu iti panaglabsing iti Philippine Competition Act kangrunaanna iti Market Allocation and Anti-Competitive Exchange of Business Information.
Nangisayangkat ti Philippine Competition Commission Enforcement Office dagiti raid tapno maimbestigaran ti emails ken dadduma pay a pammaneknek a sumuporta iti cartel-like behavior dagiti trader.
Nupay kasta, inbatad ni Atty. Christian Delos Santos ti Philippine Competition Commission Enforcement Office a saan a ma-attribute iti cartel ti alisto a panagngato ti presio ti sibuyas idi Disiembre 2022 agingga iti naudi a paset ti 2023.
