LAOAG CITY – Nagballigi dagiti kameng ti Philippine National Police (PNP) iti panangidaulo ni Police Lt. Col. Mar Louise Bondoc, ti chief of police ditoy ciudad iti inyuswat da a search warrant operation iti Barangay 36, Araniw ditoy ciudad.
Nabigbig ti subject ti operasyon a ni Alex Guarino y Agsudo, addaan ti umno a tawen ken residente iti nadakamat a barangay.
Naipalaon iti search warrant a biruken dagiti otoridad ti maysa a shotgun ken bala daytoy.
Nupay kasta, iti pannakaiyuswat ti operasyon ket narekobre dagiti otoridad manipud iti kwarto ti kabsat ni Guarino iti maikadwa a kadsaraan ti balay ti maysa a shotgun ken lima a bala na, pakairamanan ti 14 a sachet a naglaon ti maipagarop a shabu.
Naamoan a ti subject ti operasyon ket karuruwar na laeng iti pagbaludan idi setyembre ita a tawen gapu iti panaglabsing na ti Republic Act (RA) 9165 ken Republic Act (RA) 10591.
Nagkedked metten a nagpainterview iti Bombo Radyo Laoag ni Guarino idinto a ti kabsat na a ni Adel ket inbaga na a saan da pay laeng a kayat ti mangipaay ti komento agingga a saan a mapaneknekan no pudno a kukua ti kabsat na dagiti naala nga ebidensya iti uneg ti pagtaengan da.
Innayon ni Adel a kayat da a maipadalan pay nga umuna ti drug test ti kabsat na ken maeksamen dagiti naala nga ebidensya gapu ta ti laeng naipalaon iti search warrant ket ti shotgun ken bala na idinto nga adda dagiti nakumpiskar pay a 14 a sachet a naglaon ti maipagarop a shabu.
Kabayatanna, inlawlawag ni Police Lt. Col. Bondoc a ti subject ti operasyon ket naoperasyunan manen idi 2014 ken miembro daytoy ti Mamotus Drug Group nga agop-operar ditoy ciudad ti Laoag ken intero nga Ilocos Norte.
Inpalgak na a kalpasan a nawaya-wayaan ni Guarino idi setyembre ita a tawen ket sinublianan na a dagus ti illegal nga aktibidad na.
Innayon na nga nagaplikar da ti search warrant kontra ken ni Guarino kalpasan a nakaawat da ti impormasyon nga adda ti ik-ikutan na nga illegal a paltog no sadinno nga iti panangberipikar da iti Regional Civil Security Unit 1 ken naamoan da a saan a legal nga agikot ti paltog ti subject ti operasyon.
Ninigar met ni Bondoc ti alegasyon nga adda ti immuna a simrek iti pagtaengan da Guarino sakbay a narugyan ti operasyon.
Inpetteng na a naipagagangayen a kastoy ti ibagbaga dagiti pakaisayangkatan ti operasyon ngem inpasingked na a legal ti inwayat da nga operasyon no sadinno nga adda ti inusar da a body worn camera ken maysa pay a recording device.
