LAOAG CITY – Inpakammo ni Mr. Noel Andres, ti pannakangiwat ti Ilocos Norte Electric Cooperatve (INEC) nga iti napalabas a bulan ket bimmaba iti P1.11 ken ita a bulan ket .1630 centavos ti naglakaan na iti kada kilowatt hour.
Segun kenni Andres, no ti dati ket 51 megawatts ti ang-angkaten da iti Masinloc ngem ita ket napalubusanen a 25 megawatts laengen ti maangkat.
Inlawlawag na ti nabatbati a kasapulan a kuryente ket nagatang iti Wholesale Electricity Spot Market (WESM) wenno maaw-awagan a tiendaan ti kuryente.
Inbatad na a ditoy ket aggaraw latta met ti presyo no sadinno ket adda ti gundaway a nalaka ken no dadduma ket nangina.
Kunana pay nga ita a ber months wenno nalamiis ti panawen ket nalaka ti presyo iti Wholesale Electricity Spot Market.
Kabayatanna, inlawlawag ni Andres nga adda met ti panagasagana da kalpasan nga inrakurak ti National Grid Corporation of the Philippines idi kalman a posible a panagkurang ti suplay ti kuryente manipud kadagiti independent power producers.
Nupay kasta, kunana a ti Ilocos Norte Electric Cooperative ket saan a nagsagaba iti daytoy nga isu ti pagyamyamanan na.
Daytoy ket gapo ta sakbay pay iti manamnama kuma nga oras iti daytoy idi kalman ket na-stabilized met laeng ti suplay ti kuryente manipud kadagiti independent power producers.
Mainaig iti daytoy, kuna ni Andres nga uray kasano ti ayat ti National Grid Corporation of the Philippines a mangipaay ti kuryente ket awan ti mabalinan da no agkurang ti power supply.
Naamoan a ti National Grid Corporation of the Philippines ti mangidanon ti kuryente nga angkaten ti kada distribution utility.
Inbatad na a kas rakurak ti ahensya idi kalman, pito nga independent power producers ti aggigiddan nga agtarimaan ken daytoy ti rason no apay nga agkurang met ti ipaay dagitoy a kuryente.
Innayon na a no agkurang ti power supply, posible ti rotational brownout wenno paggugudwaan ti available supply nga aggapo iti independent power producers nga ipadanon da iti National Grid Corporation of the Philippines.
