LAOAG CITY – Natay ti 17 nga estudiante ken 20 ti nasugatan kalpasan a natnag ti naglugananda nga school bus iti derraas iti nasulinek a paset idiay northern Colombia.
Inrakurak ni Gov. Andres Julian iti Antioquia babaen ti panag-post-na iti social media nga X, kabayatan a dumaldayasat ti school bus manipud iti Caribbean town ti Tolu nga agturong iti Medellin ket kellaat a napasamak ti insidente iti saan pay a masinunuo a rason.
Kunana a dagiti estudiante a nakalugan ti school bus ket manipud iti Antioqueño High School a nangisayangkat ti school trip.
Inpakaammona a dagiti nasao nga agad-adal ket sinelebraranda ti graduation dagitoy iti baybay.
Inlawlawagna a daytoy ket maibilang a nadagsen a damag para iti intero a komunidad nangruna ita a bulan ti Disiembre.
Mainaig iti daytoy, segun iti maysa kadagiti nakalasat iti insidente, kabayatan a matmaturog daytoy ket kellaat nga adda ti nangngegna nga agpukpukkaw ken sipod idin ket awanen ti malagipna.
Kinasapulan dagiti rescuers nga ilugan dagiti survivors manipud iti nauneg a derraas babaen ti stretchers.
Kabayatanna, indanon ni President Gustavo Petro ti pannakipagladingitna kadagiti maseknan a pamilia no sadinno a dinakamatna a saanna a kayat nga adda dagiti ubbing pay laeng a matay.
