LAOAG CITY – Inbatad ni Senate President Pro Tempore ken Blue Ribbon Committee chair Panfilo “Ping” Lacson a silulukat paylaeng ti komite a dengngen ti 18 nga indibidwal a nagpabigbig a dagitoy ket dati a soldado a mangibagbaga a nagdeliber da ti maipagarop nga P805-bilyon a kickbacks manipod iti flood control projects iti sumagmamano a nangangato nga opisyal ti gobyerno iti pamilin ti dati a kongresista a Elizaldy Co, ngem masapol nga ilintegda nga umuna dagiti rakurak da tapno agbalin a nakapapati.
Inlawlawag ni Lacson a no dagiti nagbalin ng immuna a rakurak ti grupo ket nakastrek iti “realm of possibilities” wenno nakapapati, nabayag koma dagitoyen a naimbitaran iti komite tapno agsarit iti panagdengngeg.
Kuna na a saanda nga iserra ti ridaw ti Blue Ribbon iti 18 nga indibidwal, ti laeng kasapulan ket ilinteg da dagiti rakurak da tapno saan nga agbalin a nagulo ti panagdengngeg.
Dinakamat ti senador ti immuna nga alegasyon ti grupo nga umabot iti P805 bilyon ti pakabuklan a cash a maipagarop a naibunong kas kickbacks manipod kadagiti flood control projects iti nangangato nga opisyal ti gobyerno karaman ni dati nga House speaker Martin Romualdez, a maibilang a narigat a patien ti nasao a gatad, saan laeng gapu iti kadakkel na no di ket gapu iti kinarigat ti agiggem ken agideliber ti kastoy ti kadakkel na a kwarta.
Kabayatanna, maipalagip nga immunan a binalakadan ni Lacson ni Atty. Levito Baligod a nangipresentar kadagiti18 a dati a soldado a tingitingen ken ikorehir ti palawag da.
Segun iti senador, mabalin da nga ibabawi wenno baliwan ti sumagmamano a paset dagiti rakurak da no adda dagiti detalye a saan nga usto, ken inpetteng na a ti napateg ket maiyasideg iti realidad dagiti palawag da tapno saan a masayang ti oras ti komite kadagiti kinaulbud.
Innayon na a no maikorehir dagiti affidavit ken agbalin a nakapapati ken nakasagana nga agpaawag ti panagdengngeg tapno denggen ti testimonya da.
