LAOAG CITY – Balligi a nagturpos iti Senior High School ti dua a Persons Deprived of Liberty iti Bureau of Jail Management and Penology (BJMP) ditoy ciudad ti Laoag babaen ti Alternative Learning System (ALS).
Daytoy ti inpakaammo ni Jail Inspector Sheila Marie Sapaden, ti Officer-In Charge iti Bureau of Jail Management and Penology ditoy ciudad ti Laoag.
Segun ken ni Sapaden, malaksid kadagiti dua a balud a nagturpos iti Senior High School ket adda pay ti innem a Persons Deprived of Liberty a nag-moving up iti Junior High School.
Kuna na a nangrugi ti programa iti laeng napalabas a tawen babaen ti inisyatibo ti Department of Education ditoy ciudad ti Laoag.
Inpakaammo ni Sapaden a tunggal aldaw ti martes ken huwebes ket adda dagiti mangisursuro nga agturong iti pagbaludan tapno mangisuro kadagiti estudyante iti Alternative Learning System.
Innayon na a no adda ti mabati a modules ket addamet dagiti instructional managers iti Bureau of Jail Management and Penology a mangituloy a mangreview kadagiti estudyante a balud.
Mainaig iti daytoy, inbatad ni Sapaden a dakkel a makatulong daytoy kadagiti Persons Deprived of Liberty aglalo iti iruruwar da iti pagbaludan gapu ta dakkel ti pammati na a daytoy ti naan-anay a mangbalbaliw kadakuada ken mabalin da nga ipannakkel kadagiti papagayam ken ti pamilya da.
Naamoan a dagiti dua a balud a nagturpos iti Senior High School ket sumangsango iti kaso a carnapping ken Human trafficking idinto a dagiti nagtupos iti Junior High School ket sumangsango da met iti kaso a murder ken panaglabsing ti Republic Act 9165 wenno Comprehensive Dangerous Drugs Act of 2002.
