LAOAG CITY – Inpakaammo ni Fr. Randy Manicap, pannakangiwat ti Kaammoyo ti Kappia nga adda ti dua a mannalon a maipagarup nga iligal nga inarestar dagiti innem a sibilian a lallaki a mapapati a miembro ti 102nd Infantry Battalion of the Philippine Army iti Barangay Dampig iti ili ti Pagudpud.
Nabigbig dagiti dua a mannalon nga isuda Belmar Garvida ken Willy Bangngad ken residente iti nasao met laeng a barangay.
Segun ken ni Fr. Manicap, naipakaammo daytoy nga insidente iti Ilocos Human Rights Alliance babaen ti Isnag Yapayao Balangon Tribal Council.
Inbatadna a napaay a nangiprisentar ti warrant of arrest dagiti maseknan nga indibidual ken nagkedked dagitoy a nagpabigbig kadagiti miembro ti indigenous community.
Kunana nga agarup iti alas dies ti rabii, nagsubli iti pagtaenganda ni Garvida idinto a nagtalinaed iti military custody ni Bangngad.
Inlawlawagna a sakbay ti pannakaarestar dagiti dua a mannalon, addan ti immun-unan a panangsaludsod dagiti militar kadagitoy maipanggep iti physical ken psychological torture.
Mainaig iti daytoy, kuna ni Fr. Manicap a makaaw-awat ti pangta ti komunidad gapu iti plano a pannakaipasdek ti dakkel a dam project banag a naiget a kinontra ti nasao nga indigenous tribe.
Naammoan a dagiti naarestar a mannalon ket nabayagen a biktima ti military and police surveillance, harassment ken panangbutbuteng.
Innayonna a naiget ti panawaganda ti pannakawaya-waya ni Bangngad iti kabiitan a panawen.
Kabayatanna, pinadas ti Bombo Radyo Laoag News Team nga alaen ti reaksion ni Lt. Col. Luis Banoey, mangidadaulo ti 102nd Infantry Battalion of the Philippine Army mainaig iti daytoy ngem nagkedked a mangipaay ti aniaman nga impormasion.
