LAOAG CITY – Inlawlawag ni Barangay Chairman Melvin Santos iti Barangay 1 ditoy ciudad ti Laoag nga inusar da ti 20% Development Fund da para iti pannakasemento ti dalan a maibilang pay laeng a pribado a lote iti barangay.
Naamoan a 100 a ribo a pisos ti naiyalokar iti pannakasemento ti nasao a dalan.
Inbatad ni Santos a pinasemento da ti dalan gapu iti sentimiento dagiti kabarangayan na a malayos ti pagnaan da no agtudtudo.
Innayon na nga adda met ti pammalubos ti ina na nga agtagikua iti lote para iti panangsemento da.
Nupay kasta, saanda a naikamang iti by-pass road gapu ta saan nga ipalubos dagiti agtagikua ti lote.
Kabayatanna, naamoan ti Bombo Raadyo Laoag babaen ken ni Engr. Jorge de Malalua, ti OIC ti Assessors Office ditoy ciudad nga awan pay ti ordinansa nga inpasa ti barangay a maibilang a Road Right of Way (RRW) ti nasemento a dalan.
