LAOAG CITY – Agur-uray ti duapulo ribu a pisos ken tropio a gunguna ti agkampeon iti maisayangkat a singing competition a maysa kadagiti aktibidad iti LInggo ng Kabataan Series 2023.
Maipaayan met ti sangapulo ket lima ribu a pisos ken tropio ti first runner up idinto a sangapulo ket dua ribu a pisos ken tropio ti 2nd runner up.
Inlawlawag ni Mr. Willie Jake Sib-at, youth development officer ti Ilocos Norte Youth Development Office wenno INYD a malaksid kadagiti mangabak ket maipaayan ti saglilima ribu a pisos dagiti makastrek iti “top 8” ken maikkan met ti sagtatallo ribu a pisos dagiti nakastrek iti top 15.
Immun-una ngem iti daytoy, naisayangkat idi sabado Agosto 19 ti elminations iti nadakamat a kompetisyon idiay Imelda Cultural Center wenno ICC ti siudad ti Batac.
Mainaig iti daytoy, maisayangkat ti semi-finals a paglalabanan dagiti nakastrek iti top 8 idiay ili a Badoc intono Agosto 26 ken ti final round a paglalabanan dagiti top 3 ket maisayangkat iti ili a Dingras intono Septiembre primero.
Imbatad ni Sib-at nga agduduma a lugar dagiti pakaisayangkatan dagiti nadumaduma a kompetisyon tapno marikna dagiti amin nga agtutubo ditoy probinsia a pasetda kadagiti maisayangkat a nadumaduma nga aktibidad.
Kabayatanna, inpakaammo ti youth development officer a maigiddan iti final round ti singing competition idiay Dingras ti panagpabuya dagiti top five ti song writing competition para iti “final performance” dagitoy.
Innayonna a makagun-ud met ti kampeon iti sangapulo ket lima ribu a pisos, sangapulo ket dua a ribu a pisos iti first runner-up, sangapulo ribu a pisos iti second runner-up ken lima ribu a pisos ti consolation prize idinto a ti best interpreter ket maipaayan iti tallo ribu a pisos ken tallo ribu a pisos met laeng iti Most Like Song a mapili iti babaen ti online.
