LAOAG CITY – Inlawlawag ni Mrs. Perlita Cabello, ti mangidadaulo iti City Social Welfare and Development (CSWD) ditoy ciudad ti Laoag a dagiti laeng indigent ken displace workers ti maikkan ti relief goods wenno food packs ditoy ciudad kabayatan ti pannakaipatungpal ti Enhanced Community Quarantine (ECQ) gapu iti intero a Luzon gapu iti coronavirus.
Karaman kadagiti maibilang a displace workers ket dagiti jeepney ken tricycle drivers, karpintero ken dadduma pay.
Inpasingked ni Cabello a maarisit a naimbag ti listaan dagiti maipaayan ti relief goods wenno food packs ditoy ciudad ti Laoag tapno masigurado a dagiti laeng pudno nga indigents ken displace workers a kangrunaan nga apektado iti ECQ ti maikkan.
Kabayatanna, inpakaammo ni Mayor Michael Marcos-Keon a malaksid iti relief goods wenno food packs ket maipaayan pay ti sag-sasangaribo a pisos dagiti 20 ribo nga households ditoy ciudad ti Laoag.
Inlawlawag na a ti 17-milyon a pisos a naiyalokar a para koma iti pannakaipangato ti sweldo dagiti empleado iti gobierno lokal ditoy ciudad ket ninayunan da ti 3 a milyon a pisos tapno mapagbalin a 20-milyon a pisos.
Inbatad na a ti nasao a gatad ket isu ti maited kadagiti 20 ribo nga households ditoy ciudad gapu ta saan a naragsak no food packs laeng ti maibunong kadagiti indigent ken displace workers ditoy ciudad ti Laoag.
Inpasingked na nga inlawlawag na a naimbag kadagiti empleado ti gobierno ditoy ciudad ti Laoag a masapol nga iprayoridad da pay laeng dagiti indigents ken displace workers ita a panawen ti krisis gapu iti covid-19.
Inkalintegan ti mayor a dagiti empleado ti gobierno ditoy ciudad ket agswelsweldo da latta uray naka-home quarantine da iti agdama.
Mainaig iti daytoy, inlawlawag met ti mayor nga iti panangusar da ti pondo a para koma iti pannakaipangato ti sweldo dagiti empleado ti gobierno ditoy ciudad ti Laoag ket saanna a kayat a sawen a saandan a suruten ti pagalagadan nga inparuk-at ti gobierno national.
Innayon na a daytoy ti mapagsasaritaan a naimbag dagiti kameng ti Sang Panlungsod ditoy ciudad intono miyerkules, Marso 25 ita a tawen.
