LAOAG CITY – Umabot iti 200 nga indibidual ti naipaayan ti eyeglass ken sunglass bayat ti naisayangkat a medical mission babaen iti The Good Hope Future Foundation ken ti Sinag Tala Medical Association ditoy probinsia, partikular iti capitol auditorium.
Gapu iti daytoy, napalaos ti panagyaman dagiti nabenepisyaran iti naiyuswat a medical mission gapu ta adda dagiti nabayagen a gumawgawawa nga agpacheck up ti mata ken maikkan ti eyeglass.
Segun iti maysa kadagiti nabenepisyaran a ni Mrs. Julita Saludares, residente iti Brgy. 15, ditoy ciudad ti Laoag, agsagsagaba ti diabetes nga isu metten ti nakaapektaran ti mata na.
Kuna na nga idi mangngeg na nga adda ti nasao nga aktibidad ket insigida a ginundawayan na daytoy.
Ti medical mission nga insayangkat dagiti nasao a grupo a bukbuklen ti 50 a nurse ken doktor nga agpapada a nagturpos iti University of the East Ramon Magsaysay ken kaadwan kadagitoy ket tubo ditoy probinsia.
Mainaig iti daytoy, nagyaman ti probinsial government Iti panangpilida ti probinsia a nangisayangkatan iti medical mission gapu ta naruay dagiti nabenepisyaran saan laeng a libre nga eyeglass no di ket adda pay dagiti dimmalan ti minor ken major operation.
