LAOAG CITY – Kinumpirmaran ti City Planning and Development Office ditoy ciudad ti Laoag a nakasaganan wenno mabalinen a pagnaedan dagiti 200 nga units iti “Pabahay” iti Brgy. Talingaan.
Segun kenni Ms. Rubie Anne Bunalade, ti mangidadaulo ti nasao nga opisina, nangipatungpalen ti final inspection ti Bureau of Fire Protection ken adda laeng dagiti inbilin da a nasken a ma-comply tapno mabalinen a pagakaran wenno pagnaedan.
Kunana a dua a building a dagitoy ket addaan ti sag-100 nga unit ti nalpasen.
Innayon na nga agtultuloy ti pannakadevelop ti nasao a lugar para kadagiti maipatakder a convenient stores ken dadduma pay.
Mainaig iti daytoy, inpakaammo ni Bunalade a dagiti kangrunaan a nagaplikar para iti “Pabahay” ket dagiti empleado ti gobierno ken adda met dagiti taga sabali pay a lugar.
Inlawlawagna nga ado pay ti bakante ken agtultuloy paylaeng ti panagawat da kadagiti aplikante a mayat a mangala ti bukod na nga unit iti lugar.
Inbalakad na a dagiti mayat nga agaplikar ket agturong da laeng iti opisina da tapnon ma-assess ken maiyendorsar idinto nga adda met ti online application a mabirokan laeng iti facebook page.
