LAOAG CITY – Pimmusay ti maysa a Bgy. Kagawad iti napasamak a nakam-ames a disgrasya iti Provincial Road a paset ti Bgy. Nagsurot iti ili a Burgos a nakairamramanan ti maysa a nakalugan iti motorsiklo ken isuzu dumptruck.
Dead on arrival iti Bangui District Hospital ni Jimmy Ravina , agtawen iti 54 ken maysa a Bgy. Kagawad iti nasao a barangay kalpasan a nakidinungpar bayat nga iturturong na ti motorsiklo na iti maysa a dumptruck nga inturong met ti agnagan iti Razel Edu, agtawen iti 30, naasawaan ken residente iti Bgy. Ablan iti nasao met la nga ili.
Iti imbestigasyon dagiti kamkameng ti PNP Burgos, agpadpadaya a direksiyon ni Ravina idinto nga agpapalaod met a direksiyon ni Edu.
Nagsagaba ti driver ti motorsiklo iti sugat kadagiti nagduduma a paset ti bagi na idinto a ti driver ti truck ket saan a naan-ano.
Insigida a simmuko ti driver ti truck iti pulisya.
Manarimaan pay laeng ti naun-uneg nga inbestigasyon iti nasao a pasamak.
