LAOAG CITY – Naisayangkat ti search warrant operation iti paset ti Sitio Matirem, Barangay 57, Pila ditoy ciudad ti Laoag.
Nabigbig ti subject ti operasyon a ni Joey Vic Baptista y Fernando, agtawen ti 40, sub-contractor, dati a miembro ti Banda, addaan ti live-in partner ken residente met laeng iti nadakamat a barangay.
Rumrumuar a ti subject ti operasyon ket addan ti immuna a nakairamramanan na mainaig iti illegal a droga.
Nakumpiskar dagiti otoridad iti uneg ti kwarto ni Baptista ti 24 nga elongated plastic sachet a naglaon ti maipagarop a shabu a naipan iti balay ti eyeglasses.
Malaksid iti daytoy, adda pay ti naala dagiti otoridad a maysa a cal. 38 revolver, tallo a bala ken maysa a bolster iti pagbasuraan nga adda iti maikadwa a kadsaaran ti balay.
Kabayatanna, inbaga iti Bombo Radyo Laoag ti ina ti subject ti operasyon a ni Mrs. Pacita Baptista a sakbay pay ti pormal a pannakaisayangkat ti operasyon ket maipagarop nga adda ti tallo a pulis a simrek iti balay da ken adda ti inpakita da papel a daytoy ket search warrant.
Kuna na a nasdaaw gapu ta iti panagsawar dagiti kameng ti pulisya ket ti ayan dagiti basura da a plano na koman a puuran ti maysa a kinalkal da a nakaalaan dagitoy ti maysa a cal. 38 revolver ken tallo a bala.
Patien ti ina Baptista a naminpinsanen a nagbalbaliw ti anak na ken naadalanen iti immuna a pannakaibalud na gapu iti maipagarop nga illegal a droga.
Innayon na a dakkel ti pammati na nga amin nga ebidensya a naala iti balay da kontra iti anak na ket naimula.
Immunan nga inistorya ti ina a Baptista a nabalud idi ti anak na, addan pito a tawen ti napalabas kalpasan nga intarayan na dagiti otoridad iti checkpoint iti ili ti Currimao gapu ta malaksid nga awan ti plate number ti inturong na a lugan ket awan pay ti lisensya na nga agmaneho.
Nupay kasta, idi nakamatan dagiti pulis ti anak na ket maipagarop nga adda metten ti naala da nga illegal a droga iti likud ti lugan na.
Naamoan a ti subject ti operasyon ket nagtrabaho pay iti gobierno lokal ditoy ciudad ti Laoag iti uneg ti dua a tawen.
Kabayatanna, inbatad ni Police Lt. Col. Rafael Lero, ti chief of police ditoy ciudad ti Laoag a ti subject ti search warrant operation iti Barangay Pila a ni Joey Vic Baptista y Fernando ket maysa a drug surrenderer.
Inlawlawag na nga immunan a napilaan ti kaso mainaig iti illegal a droga ngem naibasura daytoy.
Nupay kasta, inbaga na a basar iti surveillance dagiti operatiba ket naamoan a nagsubli ni Baptista iti illegal nga aktibidad na a daytoy ket ti aglako ti illegal a droga.
Innayon ni Lero a ni Baptista ket adda iti drug watchlist da.
Kabayatanna, inbatad ni Lero nga arigna agpapada amin ti ibagbaga dagiti isaysayangkatan da ti operasyon a maipagarop nga adda dagiti pulis nga umun-una latta a sumrek iti balay ti subject, ngem kuna ti opisyal nga awan ti kinapudno na daytoy.
Inpakaammo ni Lero a napilaan idi ti kaso ni Baptista kalpasan a naalaan ti maipagarop a shabu kabayatan ti naiyuswat a checkpoint iti ili ti Currimao, ngem gapu iti saan a masinunuo a raso ket naibasura ti kaso na.
