LAOAG CITY – Naipaiman kadagiti duapulo ket walo a residente ditoy Ilocos Norte a biktima ti didigra ti tulong pinansial a naggapo iti National Housing Authority wenno NHA.
Inpeksa ni Gob. Matthew Marcos Manotoc ti panagyaman na ken ni Engr. Jefferson Ganado, District Engr. ti National Housing Authority iti rehion uno ken iti Cordiliera Administrative Region wenno CAR iti panangidanonda kadagiti nasao a tulong ditoy probinsia.
Segun kenkuana, dagiti naipaayan ti tulong a residente ket manipud iti ili ti Badoc, Dingras, Sarrat, Marcos, Laoag, Piddig, Batac, Adams, Pagudpud, Bacarra, Vintar, Pasuquin, Pinili ken Solsona.
Kagiddan daytoy, nagpadispensar ti gobernador iti nabayag a pannakaipaay ti nasao a tulong.
Immapela ti naan-anay a pannakaawat dagiti umili gapu ta saan a maliklikan nga adda dagiti gundaway a nabayag ti pannakaiproseso dagiti papeles iti gobierno.
Kunana a no saan a makaanay dagiti inpaay ti National Housing Authority a construction materials wenno ania ti livelihood assistance a kasapulan dagiti umili ket mabalin da nga idanon iti gobierno probinsial.
Inpasingked na a kas gobernador ditoy probinsia ket aramidenna ti amin a kabaelanna para kadagiti umili.
