LAOAG CITY – Umabot iti 28 a tattao ti natay kalpasan a nauram ti pagaramidan ti sapatos iti abagatan a daya ti ciudad ti Jinjiang idiay China.
Dagus a nagresponde dagiti ginasut a rescue workers apaman a naireport ti napasamak iti nasao a paktorya no sadinno nga adda ti nasurok a 200 nga indibidual dagiti naibakwit.
Saan pay a nalawag no mano ti bilang dagiti nasugatan iti insidente.
Iti inisyal nga imbestigasyon, naamoan a nangrugi ti apoy iti ground floor ti paktorya a nakaipenpenan dagiti flammable materials.
Mainaig iti daytoy, inbatad ni President Xi Jinping a ti napasamak nga uram ket nangitunda ti naruay a casualties, kagiddan ti panagkari na nga agsungbat dagiti responsable iti napasamak.
Ti ciudad ti Jinjiang a masarakan iti probinsya ti Fujian, ket maibilang kas “shoe capital” iti China no sadinno nga isu ti paggapgapwan ti 20% nga sports shoes iti intero a lubong.
