LAOAG CITY – Naarestar dagiti tallo nga indibidual gapu iti panagsugalda iti maysa a minatayan iti Sitio Otoy iti Brgy. 18, Estancia iti ili ti Piddig.
Nabigbig dagiti suspek nga isuda Alberto Bagaoisan y Tolentino, agtawen iti 50, naasawaan, mannalon, Greg Repetula y Gasilan, agtawen iti 34, naasawaan, construction worker ken Marcelino Julian y Allado, agtawen iti 53, awanan asawa, collector nga agpapada dagitoy a residente ti Brgy. 18 Estancia iti nasao nga ili.
Basar iti imbestigasion, natiliw dagiti tallo a suspek kalpasan a naaktuaran dagiti otoridad nga agay-ayamda ti Lucky 9.
Gapu iti daytoy, nakumpiskar dagiti otoridad ti maysa a set ti playing card, walo a pedaso ti monoblock chair, maysa a pedaso ti table cloth ken ti mapapati a pusta a Php 13, 410.00.
Kabayatanna, sumango dagiti suspek ti kaso gapu iti panaglabsingda iti Presidential Decree 1602 wenno ti Illegal Gambling.
