LAOAG CITY – Nasugatan dagiti tallo a retirado a kameng ti Philippine National Police iti napasamak a disgrasya a nakairamanan ti maysa nga SUV iti paset ti Barangay 10, Sta. Rosa iti ili ti Sarrat.
Segun ken ni Police Capt. Ashley Cacayorin, ti chief of police iti ili ti Sarrat, ti nangiturong ti SUV ket agtawen ti 69 ken residente iti ili ti Vintar, idinto a dagiti pasahero na ket agtawen ti 75 a taga ciudad ti Laoag ken agtawen ti 66, taga ciudad ti Batac.
Inbatad na a basar iti imbestigasyon da ket nagturong dagiti biktima iti ili ti Sarrat tapno ideliber ti national flag iti pada da metlaeng a retirado a kameng ti pulisya.
Nupay kasta, iti panagawid koman dagiti biktima ket nairidep ti driver isut gapuna a napukawan ti control iti manibela a nangitunda iti pannakaidungpar da iti poon ti marunggay,kalpasan na ket nagbalbaliktad a nagderderetso iti kataltalunan.
Agpapada a naitaray dagiti biktima iti Mariano Marcos Memorial Hospital and Medical Center iti ciudad ti Batac para iti naan-anay a pannakataming da.
Inpasigurado met ni Cacayorin nga addan iti natalged a kasasaad dagiti biktima ken minor injuries laeng ti sinagaba da iti baet a nakaro ti perdisyon ti nagluganan da nga SUV.
