LAOAG CITY – Kinumpirmaran ni Police Major Joseph Tayaban, ti chief of police ti Philippine National Police iti ili ti Badoc ti pannakakumpiskar dagiti 30 a burias a naikarga iti van partikular iti Barangay La Virgen Milagrosa.
Segun kenni Tayaban, sinita dagiti kameng ti pulisya ken opisyal ti barangay a nakabantay iti nasao a lugar, ti van a nakailuganan dagiti 30 a burias manipud La Paz Abra ken maipan kuma iti Poblacion, Banna.
Inbatad na nga idi sinita dagiti pulis ti van ket naglibas dagiti dua ngem kinamat a daytoy agingga a natiliw da iti paset ti national road.
Naamoan nga adda pay ti maysa nga indibidual a nakalugan iti motorsiklo nga isu ti nang-guide iti van ngem nakalibas daytoy.
Inlawlawag ni Tayaban a ti inbaga dagiti dua nga indibidual a nagibyahe ket 27 a burias ti karga ti van ken mapan da kuma ipan iti agnagan ti “Jasel” ti Banna ngem iti panagbilang dagiti pulis ket 30 daytoy ken agbalor ti 100 a ribo a pisos.
Kunana a basar dagiti natiliw ket saan da nga ammo no anya ti kumpleto a nagan ti Jasel ngem patien ni Tayaban a saan laeng a kayat ti maseknan ti mangdakamat iti sabali a tao.
Gapo iti daytoy, naisyuan ti citation ticket dagitoy ken nagbayad da ti 10 a ribo a pisos ken dagiti burias ket kinumpiskar da.
Mainaig iti daytoy, dagus da nga inkoordenar ka da Provincial Veterinarian Dr. Loida Valenzuela, Municipal Agriculture Mr. Reynante Cayme ken Mayor Maximo Cajigal.
Dinakamat na nga inbilin met ni Dr. Valenzuela ti pannakai-cull dagiti burias ken naikali dagitoy iti landfill iti paset ti Barangay Caraitan iti nasao nga ili.
Kabayatanna, nagballaag ni Tayaban iti publiko a saan da a labsingen ti pagalagadan seknan iti panagiserrek ti baboy a naiget a maipawil ditoy probinsya gapo pay laeng iti African Swine Fever.
