LAOAG CITY – Naaprobaran ti maikadua ken maudi a pannakaibasana ti Draft Resolution No. 2024-05-281 a mangipaay ti bileg ken ni Gov. Matthew Marcos Manotoc a mangibagi iti Provincial Government of Ilocos Norte a makisarita kadagiti akinkukua wenno dagiti fuly authorized representatives iti Lot No. 37860 para iti pannakaipalawa ti Governor Roque B. Ablan Sr. Memorial Hospital.
Daytoy ket indasar ni Sangguniang Panlalawigan Member Franklin Respicio, ti Chairman iti Committee on Laws kabayatan iti naiyuswat a regular session ti hunta probinsial.
Segun kenkuana, adda iti pakabuklan a 30 milyon a pisos ti naiyalokar a pundo para iti pannakapalawa iti nasao nga ospital.
Inbatadna a daytoy ket kas paset iti pannakaipaay iti de kalidad a klinika ken laboratorio a serbisio.
Kunana a babaen iti daytoy ket maidanon ti essential good and social services kadagiti amin nga umili.
Inlawlawagna a karaman kadagiti agbalin nga akem ti gobierno probinsial babaen ti Gobernador ket ti panangipasigurado nga adda ti panagdur-as iti benneg iti salun-at ditoy probinsia.
Innayonna nga adda ti kalawana a 6,400 square meters ti pakaestablisaran iti nasao a pasdek.
