LAOAG CITY – Umabot iti 30 a merchants wenno dagiti Micro Small and Medium Enterprises ti nakipagpaset iti Mercato ni Nanay Ces.
Ti nasao nga aktibidad ket paset iti Ilocos Norte Semana ti Ar-aria Festival.
Segun ken ni Gov. Cecilia Araneta-Marcos, nangrugi ti Mercato idi Oktubre 24 ken agngudo inton Oktubre 31 no sadinno nagpuestoda iti parking area ti Centennial Arena.
Inbatadna a daytoy ket mabalin a gundawayan dagiti umili nangruna ket aglukat daytoy iti oras ti alas singko ti malem agingga iti alas dyes ti rabii.
Naammoan a dagiti 30 nga stalls, kaaduan ditoy ket paggatangan ti taraon ken mainom a mabalin pagtambayan iti publiko.
Maipalagip a ti Mercato ni Nanay Ces ket programa pay laeng ti Gobernador idi isuna ket bise gobernador.
Immunan a naruay dagiti lokal a negosiante ti nangipadanon ti panagyamanda iti programa ti gobernador gapu ta dakkel a tulong kadakuada tapno maitampok dagiti bukudda a produkto ken manayonan ti paglakuan dagitoy kas pananggundaway no adda ti kakastoy a klase ti event ditoy probinsia.
